Quelle

Das iii Capittel

Nachdem ich nun solchs alss wie obgemelt den herren unn schafnern der stadt Strosburch hab angezeigtt und die botschaft aussgericht/da hat mich in der nacht darnach aber eyn mall ummgeben der schein des Herren und hat mir in mein hertzs hefftich geredtt/und mit solchen wortten sprechende: Wollauff/du must fadanacket unn ploss da hin/die mort glock muss geleuetet werden ehe den es dag wuert.

Zu der selbigen stundt must ich auff sein/unn was kein bleiben nach vorzihens da/unn ich saget zu meiner frawen: Ursull ich muss da van wie mier gesagt ist fadanacket/da ich nun auff die Strossen unn gassen kam yhn den lufft/da gingen alssbald mir meine arm van ein nander/unn ich fur dar van/das ich auh nit kan wissen ob ich auff der erden bliben sey oder nit.

Zu der selbigen stundt ist mir mein mundt aufgangen/und ich hab muessen redden und uber lauth schreyen: Morth uber morth/das kindt ihn muther leib muss unn wuert erschrecken/ehe dan das Gottes wort geffasset wuert.

Mordio aber ein mall/wisten alle fuersten und herren/das yhnnen aussgezogen soll warden yhr herrliches kleit/vor Gott und der welt/das sie wider Got antragen/sie wuerden auch all mit mir schreyen morth und morth.

Aber nach solchen wuert sich wider erfrouwen das kind in muther leib/unn wuert werden vill frid/allen dennen die traurig seind gewessen.

In dissent obgemelten geschrey bin ich also nakedt begriffen/unn van den nachbaurn gefangen worden/und den obgemelten Rotherren Hertto Ludwigen uber andwort worden/unn er hatt mich des morgens in den Spitall uberandwort/unn mich den schaffner endpfollen.

[…]

Das vi Capitell

Aber dem nach haben sie mich/die weil sie meinthen ich were meiner sin heraupt/Gott Weiss allein wie yhm was/gelegt und erst gefuert in eyn weithere gefencknus/als in das betzen huesslein.

Da ich nun fuer die selbigen gefencknus kam/da fyng an mein hertzs zu redden unn sprach durch mich der schein des herren/zu der lincken seitten neben mir ligt ein man/der selbig wuert sagen/warumm ich hie bin/und wuert mich verrathen. Als ich nun in das betzen huesslein kam/unn sie allevan mir wichen/ich zu meinen nachpaurn Erassmus Lentzen sprach/der dan noch zu gegen bey den bettzen huesslein war/gept myr eyn handt/und ich wil euch anzeigen das disse ding nitt auss myr seindt/sunder auss Gott/und da van weiss er noch zu sagen .

Da nun yderman van mir kam/geschach ein stim zu mir und sprach/wend dein beth herrumher/und zu der rechten seitten deines gemachs ligt Adam und zu der lincken Cain/der da ist der erst gewessen/so wider Gott angeffangen hatt zu herschen/

Und als solch stim fuer was/da hoert ich ein man der zu der gerechten seitten neben myr in einen gemach lag/den ich nicht kand/unn ich auch noch nitt weiss werr er gewesen ist. Der selbige fing an/und schrey mit grosser stim/und deth das allen tag zweymall obends und morgensalso sprechende: fewrio/fewrio uber meine kinder/helftt myr wider zu yhnnen/Linhart van Strossburg hat verlassen weib und kindt um Gottes willen.

Als nu die nacht herzu fiel/und ich itzt zu obet gessen hett/unn mich zu der rw gelegth/da hat aber ein mall die klarheit des Herren mein hetzs turch trungen und um geben/und hatt mein hertzs unn mundt uberlauth angeffangen zu redden/und also gesagt: Bist du ein gnad van Gott/was wiltu durch mich wercken/so ein arme unn vorachte creatuer/dan man hatt mich hie her gelegth/das man mich weder sehen noch hoerren will/und man voracht mich gar.

Da hatt das wunder des herren zu mir gesagt und gesprochen: vill warden dich hoerren und doch nitt hoerren/will warden dich sehen und doch nitt sehen/vill warden dich hoerren und doch nitt sehen/vill warden dich sehen und doch nitt hoerren Du hast ein dochter die heist Elizabeth/was sie ist alth. 14.ior/so sollmich das folck sehen in klorheitt und gross wunder erkennen/und will ich auch zu der selbigen zeit alles folck ergetzen yhres leyds/dan da ich dich auff geweckt hab zu Hannaw auff den Rheyn/yhm 22.ior/hatt sich mein hertzs erbidempt uber die van Israel.

Aber ich hab auss gelassen meinen athem uber sie/und sie meine schoefflein erleuchtet/meyne schoff hab ich erschreckt yhn yhrer arbeit/unn yhn yhren heuessern/und in den hecken/das sie nun foerther hin reden werden die Goettlichen warheit ahn alle schrift/und werden mich erkennen vam minsten biss auff den meinsten.

[…]

Das x Capitell

Weither so ist abermals dis wunder unn der schein des herren uber mich komen/und hatt mein hertzs ummgeben/und zu mir also gesagt/sag deinen brudern und sprich/geth hin wider in das hauss Israel/sag yhn das sie sich halten an mein weg allein/yhr sollet nit merr segnen wasser und saltzs/wan ich hab gesegneth das gantzs erdrich. Sie haben mein wortt verdunckelt/unn yhr wortt weit auss gebreit/aber wenig seind der wort/dadurch man salig wurt.

Sie haben gesucht yhr ehr und geitzs/ich aber will zu stoeren die falschen schriften yhres dands/die sie neben meinen wort eingeffuertt haben. Sag auch deinen brudern/das sie sich nit meer schelten lassen herren und grosse prister/wen Got ewer aller vatter ist allein der Herr/allein der Hoechst/unn Christus der oberst prister unn meinster.

Ir solt euech unwurdig achten zu nissen allein das brot des nachtmalss/das durch die wortt des evangelions und des herren nachtmalss gesegneth wurt/Sundern solt das auch mit theillen den andern/so hungrich und durstich dar zu seindt/und solleth further hin umm acht unn neuner zeit wan die schofflein van der rwe komendt seindt/yhnen vorkunden das heilig evangelion/sie lerren setzen allen glauben/und hoffnung/und zu versicht in mich allein.

Ein solches zeiget ich an den man/der mein ausswarttet mit essen un trincken/wie der schein des Herren/und die wunder Gottes uber mich komen weren/und begerth van yhm papier und dinthen/einn solches zu beschreiben/da sagtt der selbige zu mier/du fantessirst abereinst/kanstu doch nitt schreyben/In dem kam zu mir ein gutter brueder/mit namen Veith Schelhamer/dem sagt ich alle disse geschicht/da ging er hin/und bracht einen aus den predicanten/unn er schreib van mir alle geschicht/sampt dissent reden und wortten.

Da ich nun wider aus dem betzen heusslein kam/und wider in den spitall in die gemein stuben gebrocht ward/da liss ich zu mir komen die predicantten/als den Doctor/und auch den zymmprion/unn alss sie zu mir kamen/da frogeth ich sie also sprechende: Was haltet yhr van der klorheit/die mich also bezwingt zu reden und zu schreyen/alss nemmlich die drey stimmen/und das ander/welches oben stadt/auf ein solch haben sie mir geandwort/unn vormeinth/es werr des dueffels gespenst/ich solt es bass probiren/unn solt darnach aus spewen.

Da sprach ich zu yhnen/ist das ein gespenst/so ist al unsser glaub nichts/wen also hab ich geredt und gebetten allweg/wenn es zu mir komen ist/und noch kommpt. Almechtiger ewiger Gott. Du hast mich beschaffen/und all meine fusstridt stand in deinen gwaltt ich bitt dich fur mich nitt in versuchung/ist das ein gnod van dyr/ya was du dan wiltt/das will ich auch/und so kom/unn wan bey mier/und lerr mich deinen willen/bistu aber nit ein gnod/so weich weitt van mier. Auff ein solches haben mir die obgemelten nit geandwortt/da batt ich/das sie Gott den vatter solten fuer mich bitten/wer es ein gespenst und ein anffechtung/das er mich da van wolt endbinden/und batt sie weither/das sie forsten und herren/und die fromen stadthalter und regenten aller stedt vor augen hetten/wan sie unsere hirtten werren/und hie mit schieden sie van mir.